ភ្នំពេញ៖ ក្រោយពីលោក ហ៊ុន ម៉ាណែត ទទួលតំណែងនាយឧត្តមសេនីយ៍ជាផ្លូវការ ដែលត្រូវបានសម្តេចពិជ័យ ទៀ បាញ់ បំពាក់ឋានន្តរស័ក្តិ នៅថ្ងៃព្រហស្បតិ៍ ទី២០ ខែមេសា ឆ្នាំ២០២៣ លោក ហ៊ុន ម៉ាណែត បានអរគុណដល់មន្ត្រីគ្រប់ជាន់ថ្នាក់ និងពលរដ្ឋទាំងអស់ដែលបានផ្ញើសារអបអរសាទរចំពោះលោក។
ទាក់ទងនឹងការដំឡើងឋានន្តរស័ក្តិដល់លោក ហ៊ុន ម៉ាណែត ក៏មានមតិរិះគន់ពីក្រុមបក្ខប្រឆាំងផងដែរ។ ប៉ុន្តែលោក ហ៊ុន ម៉ាណែត ថាលោកមិនខ្វល់ចំពោះអ្នកដែលទើសនឹងការដំឡើងឋានន្តរស័ក្តិរបស់លោកទេ ដោយលោកថា ទុកឱ្យពួកគេបន្តទើសទៀតចុះ។
លោកថ្លែងដូច្នេះថា៖ «ចំពោះអស់លោកដែលពូកែខាងឆ្ងល់អំពីច្បាប់និងទម្លាប់របស់កងទ័ព ក្នុងការតែងតាំងផ្លាស់ប្តូរមុខងារឬតម្លើងឋានន្តរស័ក្តិយោធិន និងចំពោះអ្នកដែលទើសចំពោះការតម្លើងឋានន្តរស័ក្តិសម្រាប់រូបខ្ញុំ គឺសូមបន្តឆ្ងល់ និងបន្តទើសតាមការគួររបស់អស់លោកចុះ បើអស់លោកមានពេលវេលាច្រើន និងអត់មានកិច្ចការអ្វីផ្សេងសម្រាប់ធ្វើ។ខ្ញុំអត់មានពេលវេលាដើម្បីធ្វើការពន្យល់ឬឆ្លើយតបជាមួយអស់លោកទេ ព្រោះពេលវេលារបស់ខ្ញុំត្រូវចំណាយទៅលើកិច្ចការអ្វីដែលមានប្រយោជន៍»។
លោកគូសបញ្ជាក់ថា ខណៈលោកកំពុងធ្វើដំណើររាប់រយគីឡូម៉ែត្រ ដើម្បីបន្តចុះជួបជាមួយបណ្តាអង្គភាពកងទ័ពដែលឈរជើងនៅតាមព្រំដែន ដើម្បីត្រៀមការពារបូរណភាពទឹកដី លោកមិនចំណាយពេលឆ្លើយតប ឬទើសលោកទាំងអស់នោះទេ។
លោកថា៖ «ការងារនេះវាមានអត្ថប្រយោជន៍ចំពោះជាតិមាតុភូមិ ជាងចំណាយពេលឆ្លើយតបនឹងការឆ្ងល់ ឬទើសរបស់អស់លោក។ ខ្ញុំនិយាយតាមត្រង់ទេណា សូមកុំខឹង»៕